موکەریان-کۆڵبەرێک لە سنووری بانە بەهۆی سەرمایەوە گیانی لەدەستدا بەگوێرەی هەواڵێکی گێشتوو بە ئاژانسی هەواڵنێری موکریان، بەرەبەیانی ڕۆژی چوارشەممە ٢٩ی ڕێبەندان، کۆڵبەرێک بەناوی (ئەیوب ق) تەمەن ٢٥ ساڵ کە خەڵکی بۆکان-ە، بەهۆی سەرمایەوە لە بەرزاییەکانی سنووری کێلێ و نەنۆری بانە گیانی لەدەستدا. هەر بە پێی هەمان ڕاپۆرت، گروپێک لە کۆڵبەران کە لە بەرزاییەکانی کێلێ و نەنۆر کاریان دەکرد، کاتی گەڕانەوە دەوروبەری کاتژمێر ١٠ی بەیانی جەستەی بەستووی یەکێک لە هاوەڵەکانیان سەرەنجیان ڕادەکێشێت کە لە سەرەتای ڕێگاکەدا ڕەق هەڵاتبوو. لەلایەن کۆڵبەرەکانی ترەوە بە خێرایی کارمەندانی فریاکەوتن ئاگادار کرانەوە، بەڵام بەهۆی تێپەڕبوونی ماوەیەکی زۆر لە کاتی گیان لە دەستدانی کۆڵبەرەکە، کار بۆ ژیانەوە لەلایەن کارمەندانی فریاکەوتنەوە بێ ئاکام بوو و تەرمەکەی لەلایەن کارمەندانی ئاگرکوژێنەوە ڕەوانەی نەخۆشخانەی سەلاحەدین کرا. جێی ئاماژەیە ناوبراو خێزاندارە و دو منداڵیشی هەن.
